O Rio Natura Monbus Obradoiro xogará este fin de semana o penúltimo partido na casa da tempada, ante o Unicaja (domingo, 12.00 horas). O encontro será ademais unha homenaxe a Oriol Junyent, recentemente retirado, cuxo número colgará no teito do Fontes do Sar dende este domingo.

O pivote, xa recuperado tras a emotiva rolda de prensa de despedida celebrada en Sar ante os medios, indica que "día a día sigo recibindo mensaxes de cariño, mesmo na rúa. Síntome moi agradecido por iso. Dende o momento no que me lesionei, aquí nunca me faltou apoio e é algo que agradezo na alma a todo o mundo". Recoñece que aínda que "sempre que se vai alguén hai mostras de cariño", cre que foron "moi reais e moi especiais".

Para este domingo, o club lanzou unha oferta moi especial: as entradas de todo o pavillón valerán 15 euros, recordando o número do catalán, que será retirado na previa do choque. "Para min é algo moi grande. A outra camiseta retirada é a de Bernard Hopkins, un americano que achegou moito á Liga Endesa, e que ademais tiven a fortuna de ter como compañeiro e é tamén unha gran persoa. Bótoo de menos e será un xeito simbólico de estar ao seu lado para sempre", explica.

> Por último, recorda que á marxe de expectativas persoais, o máis importante "será que o equipo poña a guinda do pastel cunha vitoria". Por iso, anima a todos os afeccionados a asisitir "e dar ese apoio extra que sempre gardan para cando se necesita. Espero que Sar estea como nas mellores ocasións", conclúe.

O Rio Natura Monbus Obradoiro - Unicaja (domingo 10, 12.00 horas) será probablemente un dos partidos máis emotivos para Oriol Junyent, a pesar de ser posterior á súa retirada das pistas. O pivote asistirá nel á súa homenaxe e retirada de camiseta.

Ninguén máis lucirá o número 15 no Rio Natura Monbus Obradoiro. É un feito que será consumado este domingo na previa do encontro ante o Unicaja malagueño, onde se renderá homenaxe ao eterno capitán e a súa camiseta será retirada e colgada no máis alto do pavillón, onde só reside ata o momento a doutro ídolo obradoirista: Bernard Hopkins.

Para que o encontro sexa unha total ofrenda ao catalán, o Rio Natura Monbus Obradoiro quere que acudan todos os afeccionados que o viron xogar algunha vez, e para iso, decora o pavillón co número do seu dorsal: todas as entradas ao Fontes do Sar valerán para este encontro 15 euros, sen importar a zona (*).

Así, Junyent poderá recibir os aplausos de Fondos, Tribunas 2, Tribunas 1 e Tribunas Retráctiles polos seus anos de dedicación e achega ao equipo conducido por Moncho Fernández.

A venda está xa aberta tanto mediante a páxina web do club (www.obradoirocab.com) coma en oficinas, con horario de 10.00 a 14.00 e de 17.00 a 20.00 horas.

(*)As entradas en Tribunas Retráctiles poderán ser compradas só por actuais abonados do club

O Rio Natura Monbus Obradoiro acabou cedendo en Sar ante a calidade do Real Madrid. Os de Moncho Fernández, acompañados en todo momento por unha afección con fe inquebrantable, aguantou os arreóns do líder da Liga durante algo máis de vinte minutos, pero sucumbiu ante a explosión de Jaycee Carroll nun terceiro cuarto estratosférico.

O escolta americana volveu lucirse en Santiago, nun escenario, que se lle vén dando moi ben nas últimas tempadas. Despois dunha primeira parte na que tivo pouca relevancia, Carroll dinamitou o encontro con doce puntos practicamente consecutivos, cos que tirou por terra o bo traballo dos santiagueses durante dous cuartos.

Non obstante, o actor principal foi Gustavo Ayón: 18 puntos e oito rebotes para convertise no pesadelo fundamental do Rio Natura Monbus Obradoiro, con 24 de valoración. O mexicano foi un rompedeiro de cabeza constante para os homes interiores de Moncho Fernández, acreditando un excepcional 89% de acerto.

No Rio Natura Monbus, Juanjo Triguero asinou unha das actuacións máis solventes da tempada, referente na pintura durante varios tramos do partido. O pivote foise ata os 17 de valoración, con 12 puntos, e inmaculado nos tiros de campo.

Nos prolegómenos do encontro Terry Porter, lenda da NBA, recibiu o bastón de peregrino, a Compostela, e demais instrumentos necesarios un día antes de arrancar o Camiño de Santiago, na iniciativa solidaria promovida pola súa fundación e a FundaciónbHeracles.

Co partido en xogo, quen impuxo a súa lei foi Gustavo Ayón. O pivote moveuse como quixo na zona obradoirista, cun gran xogo de costas a canastra, traballando moi ben os seus defensores. Doce puntos no primeiro cuarto aos que o Madrid engadiu a inspiración de KC Rivers, para poñer a primeira gran renda no marcador. O americano cravou dous triplos rematando boas triangulacións dos homes de Laso, que en todo momento souberon que fai eles uso do extrapass para xerar vantaxes e superar a armazón defensiva obradoirista.

Pola súa banda, o Rio Natura Monbus Obradoiro viviu da veteranía de Triguero, apoiado pola agresividade de Corbacho e Waczynski. Os tiradores, incapaces de encontrar fortuna dende lonxe, atacaron a zona e puxeron de pé o público despois dun reverso magnífico deAdam. O Madrid, dende o triplo, cimentou a primeira das súas escapadas (17-25).

O combinado de Moncho Fernández mellorou moito a súa versión defensiva no segundo cuarto. O equipo da capital empezou a ter problemas á hora de xerar xogo en ataque, fiando a anotación aos tiros libres. O Rio Natura Monbus ofreceu a súa mellor versión, con Pepe Pozas no temón. Kleber posterizou a Bourousis, e Pumprla e Miller abusaron do aro para poñer o partido nun pano (35-38).

Creu Sar nunha nova xesta dos gladiadores obradoiristas. O Rio Natura Monbus conseguira levar ao seu terreo a contenda, cun ritmo máis trabado que impediu ao Real Madrid explotar a súa principal virtude: os contraataques.

Durante os primeiros minutos do terceiro cuarto continuou a melloría progresiva dos de Moncho Fernández, que chegaron mesmo a selar as táboas. Foi entón cando reapareceu Gustavo Ayón, anulado durante bastantes minutos por Jesús Chagoyen, e a versión máis explosiva de Jaycee Carroll. Dende a liña de persoal, en suspensión e tamén de tres: o repertorio da escolta é moi extenso, e unha vez máis en Sar volveu exhibir todo o seu potencial.

Mentres, o Rio Natura Monbus Obradoiro, despois de acumular varios ataques imprecisos, tratou de reaccionar coas penetracións de Pepe Pozas, combinando ben con Corbacho (47-65). Tamén as perdas dos galegos foron decisivas á hora de inclinar o partido cara á capital.

Co partido practicamente decantado, foi momento de servir espectáculo á afección. Fíxoo por un lado Nankivil, finalizando unha soberbia contra entre Giannopoulos e Pozas, e tamén Marcus Slaughter, un habitual á hora de levantar os afeccionados das súas butacas. Os santiagueses encontraron fluidez co acerto de Cárdenas e Giannopoluos, pero a distancia era insalvable.

Laso quixo dar minutos a Luka Doncic, xoia da coroa da canteira do Real Madrid. Despois de debutar o xoves contra o Unicaja, o xovencísimo xogador merengue luciu desenvoltura e foi aplaudido polo Fontes do Sar, por unha afección que volveu ser protagonista. Nin sequera co seu equipo perdendo por 20 puntos deixou de animar o público aos seus, e despedíronlles postos de pé alentándoos para as próximas batallas.

En sete días o Rio Natura Monbus Obradoiro repite en Santiago, recibindo ao Unicaja. Un partido que será moi especial para todo o obradoirismo, no que se renderá homenaxe a Oriol Junyent. O eterno capitán poderá recibir a calor da súa afección, nunha mañá na que se retirará a súa camiseta, que presidirá o Fontes do Sar dende as alturas, ao lado da doutro histórico: Bernard Hopkins.

Íñigo Caínzos – Obradoiro CAB

Rio Natura Monbus Obradoiro 76: Rafa Luz (0), Corbacho (6), Waczynski (15), Kleber (11), Triguero (12) – quinteto inicial – Miller (6), Pumprla (4), Cárdenas (3), Giannopoulos (5), Pozas (8), Chagoyen (0) e Nankivil (6).

Real Madrid Baloncesto 85: Campazzo (0), Llull (8), Rivers (8), Ayón (18), Reyes (8) – quinteto inicial – Nocioni (9), Maciulis (2), Sergio Rodríguez (9), Doncic (1), Carroll (14), Bourousis (3) e Slaughter (5).

Árbitros: Benjamín Jiménez (43), Francisco José Araña (22) e Pedro Munar (48). Eliminaron por faltas a Daniel Miller, do Rio Natura Monbus Obradoiro.

Parciales: 17-25, 18-13, 12-27, 29-20.

Incidencias: partido correspondente á xornada 31 da Liga Endesa, disputado no Fontes do Sar ante 5.570 espectadores. Gardouse un minuto de silencio na previa do partido en memoria das vítimas da traxedia de Nepal.

Moncho Fernández: "O partido estará nos básicos"

O Rio Natura Monbus Obradoiro enfróntase mañá no Fontes do Sar ao Real Madrid (12.40 horas), que chega a Compostela líder da Liga Endesa, último encontro dos brancos antes da Final Four. Moncho Fernández indicou hoxe no San Francisco Hotel Monumento, membro do Club de Empresas Obradoiro, que "para competir con estes equipos tes que facer moitas cousas ben". O técnico estivo avalado nesta comparecencia de prensa por un dos capitáns, Pavel Pumprla.

Fernández apunta, que como habitualmente, “temos que facer o que sabemos e minimizar o que facemos mal, porque estes equipos cho fan pagar moi caro, como nos pasou co F.C. Barcelona". Aínda que neste caso, puntualiza, "son equipos con características diferentes, aínda que nun día que temos entre os dous para preparalo, tampouco podes inventar nada. Nós imos intentar xogar coas armas que usamos todo o ano".

Dos brancos afirma que "están nun estado de forma espectacular. Dominaron contra o Unicaja cunha autoridade enorme. E na Euroliga, igual, xogando xenial no aspecto ofensivo, como nos teñen afeitos, pero defensivo tamén. Chegan nun momento brillante. Non se nos esqueza que ademais de como están en Liga e Euroliga, gañaron Supercopa e Copa do Rei”. Ao que engade: "A súa calidade fai que pagues os erros moi caros. Sempre falamos de formulacións pero ao final os partidos adóitanse ir nos básicos como parar o seu contraataque, pechar os rebotes ofensivos nos que son poderosos, etc".

ARRIBA