Oriol Junyent emociona na súa despedida

Oriol Junyent anunciou hoxe a súa retirada como xogador de baloncesto, tras, a pesar de moitos traballos e rehabilitación, non conseguir recuperarse da lesión de xeonllo que sufriu o pasado curso. O pivote compareceu hoxe ante os medios, no pavillón que foi a súa casa durante estes últimos anos da súa carreira, o Fontesdo Sar.

O conselleiro do club, Oscar Rodríguez, empezou agradecendo ao catalán "ter vestido a camiseta do Rio Natura Monbus Obradoiro, sendo en todo momento un exemplo de xogador de club, de compañeiro e de capitán. Axudounos a conseguir éxitos deportivos colectivos e tamén éxitos individuais, co desenvolvemento doutros xogadores que creceron ao seu lado, complementando o magnífico traballo do noso equipo técnico", declaraba.

O directivo remontouse ao pasado ano, cando o xogador caía ao chan ante o silencio da Caldeira. Os ligamentos cruzados do seu xeonllo dereito romperan e obrigaríano a pasar por quirófano ao rematar a campaña: "Cando os nosos servizos médicos nos comunicaron a imposibilidade de que Oriol formase parte do equipo deportivo desta tempada, o Consello de Administración decidiu retirar o seu número quince". Tamén recordou que a afección poderá despedirse del nese mesmo parqué, nunha homenaxe que se realizará durante o partido contra o Unicaja.

Moncho Fernández, en nome do corpo técnico do club, tamén expresou os seus sentimentos: “Hai dúas fotos no meu despacho que resumen a miña relación con Ori. Unha é do ascenso a Liga Endesa, na que me está a levantar polos aires. A outra, un póster con todos os xogadores e unha palabra ao lado de cada un, que no seu caso é COMPROMISO", ao que engadiu para concluír: "Para min é unha honra ter sido o seu adestrador despois da traxectoria que ten, así que só podo dalo as grazas e dicirlle que o quero moito".

Foi breve tamén o seu compañeiro durante dous anos, Rafa Luz, ao que lle tocou recoller a testemuña da capitanía no vestiario galego: "É o momento máis difícil que ningún xogador se formula. Remátase a carreira dun grande, non só como xogador. Axudou a triunfar a moitos máis alá de si mesmo, e esa é a imaxe que teño del. Se hoxe son capitán é polo que aprendín con el. Grazas por compartir vestiario comigo e ensinarme tanto".

Cando chegou a quenda do protagonista, un aplauso invadiu a sala de prensa, e un visiblemente emocionado Oriol recorreu ao papel para non se deixar nada no tinteiro:

"Bos días, grazas a todos por vir. Quíxenvos reunir hoxe, á prensa, para comunicarvos que tras 9 meses despois da operación que se me efectuou no xeonllo dereito pola lesión que sufrín o pasado ano no partido contra o Joventut, e despois de esgotar todas as vías e técnicas posibles para a súa recuperación, polo que quero agradecer tanto ao club como aos servizos médicos do Hospital La Rosaleda e Fremap o tempo e dedicación que empregaron comigo para intentar por todos os medios a miña volta ás canchas. Por desgracia, os resultados non foron favorables.

A lesión era máis complicada do que cría nun principio, e con moita pena, teño que dicir que o estado do meu xeonllo me obriga a anunciar a miña retirada como xogador profesional de baloncesto.

Voume cun sabor agridoce, xa que me tivese gustado seguir exercendo a profesión que tanto amo durante máis tempo, pero a incapacidade física do meu xeonllo mo impide. Aínda que quedo con todo o vivido durante estes case 21 anos de xogador profesional. Foron moitos os equipos nos que estiven; afeccións e seguidores que me apoiaron e aplaudiron; adestradores que apostaron por min, ensinándome cada día a crecer como profesional e moitos compañeiros que estiveron ao meu lado ao longo da miña carreira que me ensinaron a ser mellor persoa.

Oriol Junyent deixa definitivamente as canchas

Mañá ofrecerá unha rolda de prensa no Multiusos Fontes do Sar

Oriol Junyent, ex xogador do Rio Natura Monbus Obradoiro, fará pública mañá a súa retirada como xogador de baloncesto. Será mediante unha comparecencia de prensa ás 10.30 horas no pavillón onde xogou os últimos catro anos da súa carreira, o Fontes do Sar, e acompañado por representantes do Consello de Administración,o técnico Moncho Fernández e o actual capitán do equipo, Rafa Luz.

O pívot e eterno capitán do equipo galego en Liga Endesa, deixa así definitivamente as canchas, das que permanecía afastado dende unha lesión no ligamento cruzado do seu xeonllo dereito sufrida durante a pasada campaña, e que o fixo pasar polo quirófano en verán. Pese ao traballo de rehabilitación e aos seus continuos intentos por volver á práctica activa do deporte da canastra, o xeonllo do catalán dixo basta e oblígao a tomar esta determinación.

O Rio Natura Monbus Obradoiro organiza este fin de semana para os seus afeccionados unha viaxe a Madrid en colaboración con Monbus, membro do Club de Empresas Obradoiro. Así, os afeccionados poderán asistir ao encontro ante o Movistar Estudiantes (domingo, 18.30 horas - non televisado).

O prezo de viaxe e entrada será de 19 euros para peñistas, 25 para abonados e 29 para afeccionados non abonados. A saída está programada para as 8.00 horas da mañá do domingo dende o Multiusos Fontes do Sar, con volta ao rematar o encontro. Ademais, quen goce do pack de viaxe terá de regalo un convite para o partido dos obradoiristas fronte ao Unicaja no Fontes do Sar.

Os que xa teñan transporte para ir pola súa conta animar o equipo no encontro que abre a recta final do campionato, poden tamén comprar unicamente a súa entrada, cun prezo de 10 euros.

Os interesados poderán anotarse durante a semana ata o venres 24 ás 14.00 horas nas oficinas do club, con horario de luns a venres de 10.00 a 14.00 e de 17.00 a 20.00 horas. Tamén poderán facelo mediante transferencia bancaria á conta ES92-2080-0375-1130-4001-6453 e enviando o xustificante da operación xunto con nome, apelidos, e número de sabonado de ser o caso, ao correo abonados@obradoirocab.com.

Os xogadores do Rio Natura Monbus Obradoiro, Daniel Miller, Keaton Nankivil e Fran Cárdenas foron hoxe tres dos convidados do Grupo Cenor no “Compostela Gastronómica”, un festival de cociña que se celebra na cidade durante esta fin de semana.

O membro do Club de Empresas Obradoiro organizou, en colaboración con varios establecementos do sector servizos como o Pazo de Altamira, un flashmob que encheu as rúas do casco histórico de globos, sorrisos e regalos, en consonancia coa campaña actual do grupo: “Contaxiamos optimismo”.

Como clausura, os xogadores do club exerceron de mans inocentes no sorteo de varios regalos, entre eles, catro entradas dobles para o partido que enfrontará aos obradoiristas ao Unicaja no Fontes do Sar.

ARRIBA