A previa da décimo oitava xornada de Primeira FEB, na que o Monbus Obradoiro se enfronta ao UEMC Real Valladolid, tivo esta vez un toque especial e diferente.
O adestrador Félix Alonso, acompañado por tres xogadores do equipo (Nacho Varela, Sergi Quintela e Alonso Grela), desprazouse ao CPI Ponte Carreira para participar nunha rolda de prensa pouco habitual: responder ás preguntas dos mozos alumnos do centro, que abarcan desde primeiro de Primaria ata cuarto da ESO.
O salón de actos encheuse de ilusión e curiosidade, con nenos e nenas lanzando preguntas que, en ocasións, nin sequera os xornalistas máis experimentados se atreverían a formular. Entre risas e momentos entrañables, os integrantes do Monbus Obradoiro gozaron dun cálido recibimento que se converteu nun auténtico baño de masas.
A visita non rematou aí. Tras a rolda de prensa, o grupo achegouse á aula de Infantil, onde os máis pequenos tamén puideron gozar da experiencia e compartir un momento único cos seus ídolos.
