Nado o 19 de marzo de 2001 en Tbilisi, Xeorxia, Rati Andronikashvili xoga no posto de base e unirase ao Monbus Obradoiro para reforzar o posto que quedou sen cubrir tras as baixas de Toms Leimanis e Tomeu Rigo.
Mide 1,94 metros de altura e, con 23 anos, xa conta con experiencia en España, xa que xogou na ACB co UCAM Murcia e o Casademont Zaragoza. Agora chega procedente do VEF Riga, co que participou na liga LAT-EST BL e na Basketball Champions League, promediando 8,3 puntos, 4,7 rebotes e 2,7 asistencias na primeira, e 6 puntos, 2 rebotes e 1,5 asistencias na segunda.
Desde o Monbus Obradoiro, Héctor Galán, director xeral do club, declarou: “Estamos contentos de anunciar a incorporación de Rati ao equipo, neste caso á liña exterior. É un xogador que vén ocupar a posición de un, aínda que tamén en determinadas situacións pode compartir esa posición con outro un ou con outro base en pista. Trouxemos un xogador novo, en proceso de crecemento e formación, con experiencia na Liga Endesa en equipos como Murcia ou Zaragoza”.
“Rati achegaranos presenza física, xa que é un xogador grande para a súa posición. Ademais, ten capacidade de defensa en todo o campo e, en ataque, posúe unha boa lectura do bloqueo directo e do xogo de transición. En xeral, vén reforzar a liña exterior, que quedara un pouco coxa polas lesións de Tomeu e Toms. Con el e coa incorporación progresiva de Álvaro Muñoz, conseguimos volver a ter unha liña exterior de garantías”.
Para rematar, Héctor Galán engadiu: “Esta incorporación é outra mostra do esforzo, da aposta e do compromiso do Consello de Administración e do club co equipo para mantelo ao máximo nivel competitivo na liga. Como sempre facemos, desexámoslle a Rati toda a sorte para a tempada e unha rápida adaptación ao equipo, ao club e á cidade”.
Desde o club, están a traballar para que o xogador poida estar presente no partido de mañá no Multiusos Fontes do Sar para ver e vivir o ambiente dos partidos do seu novo club.
