Volven os playoffs coa terceira e cuarta xornada por disputarse. Nun principio, de todas as eliminatorias que hai en xogo, só dúas poden rematar no terceiro partido; pola contra, as outras teñen asegurado o cuarto encontro.
Este último é o caso do Monbus Obradoiro que, tras gañar o primeiro partido, caeu no segundo ante o Súper Agropal Palencia. Agora, os galegos deberán gañar polo menos un dos dous encontros en terras castelán-leonesas se queren seguir vivos e levar o desempate a Santiago de Compostela.
Os de Félix Alonso non viaxarán sós, xa que unha gran marea obradoirista xa adquiriu a súa entrada para estar presente en ambos compromisos de tanta importancia. En total, serán máis de 100 persoas as que estarán apoiando o equipo o venres e o domingo, ambos ás 20 horas.
Rolda de prensa
O adestrador do Monbus Obradoiro matizou que ten xogadores que chegan con algunhas molestias, algo “lóxico polo feito de xogar dous partidos consecutivos. Non cremos que esas molestias vaian supoñer un problema á hora de poñer en risco a súa participación”. Aínda así, de momento está en risco que Álex Galán poida xogar, “xa que está cunha gastroenterite aguda. Imos agardar a que o médico, que está agora mesmo no hospital, nos conte. Dou por feito que, polo menos para o partido de mañá, vai estar descartado, e vexo moi complicado que poida chegar ao partido do domingo”.
Analizando os dous primeiros partidos dos playoffs, opina: “Hai dúas partes completamente diferenciadas. Unha na que temos o control absoluto do xogo, e outra na que o noso inicio é moi malo e, a partir de aí, cambia por completo a dinámica”.
“Hai cousas que non nos podemos permitir: canastras fáciles, situacións de un contra un, moito xogo en transición, que mesmo remataron en bandeixas moi fáciles en moitas ocasións. Nós, desde o principio da serie, temos moi claro o diagnóstico de por onde ten que ir este playoff; a cuestión é aplicalo”.
O rival
O seu rival é o Súper Agropal Palencia, quen “busca o contacto, a agresividade, meter moitas mans. Todo iso, seguramente, e ata que punto llo permitan os árbitros neste caso, verase exacerbado alí, ao abeiro do seu pavillón, da súa xente e do seu público. Por iso, igual xogan máis intensos e agresivos, o que significa que van esixir e poñer o listón moi alto nese sentido”.
