A nova incorporación do Monbus Obradoiro, Vladimir Brodziansky, chegou a Santiago de Compostela en avión procedente de Murcia e na mañá deste martes xa pasou o recoñecemento médico no Hospital HM La Rosaleda da capital.
Tras superar o oportuno recoñecemento médico e comprobar que se atopa en perfectas condicións físicas, trasladouse ao Multiusos Fontes do Sar, onde tivo o seu primeiro contacto con Félix Alonso, Fran Hernández e Ricardo Rey. Ademais, xa participou no primeiro adestramento da semana xunto cos seus novos compañeiros de equipo.
Está previsto que, tras os adestramentos desta semana, entre na convocatoria do partido do próximo sábado ás 18:30 horas fronte ao UEMC Real Valladolid, no que pode ser a súa presentación ante a que un día foi a súa afección.
