O Monbus Obradoiro incorpora ao letón Jānis Timma para reforzar a posición de ala-pivote. O xogador de 31 años recalará en Santiago de Compostela despois de comezar a tempada no Darussafaka, sétimo clasificado na Super Lig turca.

Deste xeito, o club aproveita o parón de febreiro, motivado pola disputa da Copa do Rei e as ventás FIBA, para, estratexicamente, reforzar o potencial da plantilla coa intención de conseguir os obxectivos sinalados nos doce partidos restantes da tempada 2023-2024.

No presente curso xogou 17 partidos, 10 en liga, no que conseguiu, de media, 11,4 puntos, 4,6 rebotes e 1,1 asistencias. Ademais, disputou a Basketball Champions League, na que asinou 8 puntos, 3,6 rebotes e 1,4 asistencias por encontro en sete enfrontamentos.

Disputou 25 encontros coa selección letoa, e atópase entre os 24 citados na lista previa do seleccionador, o italiano Luca Banchi, para disputar os primeiros dous partidos da fase clasificatoria para o Eurobasket 2025. O vindeiro luns sairá a convocatoria definitiva para eses enfrontamentos nos que Letonia medirase a España, en Zaragoza, o vindeiro xoves, e Estonia, e na que pode estar o novo xogador obradoirista.

Posúe unha dilatada experiencia a nivel internacional. Acumula 25 encontros coa súa selección en torneos internacionais. En 2013 foi elixido por Memphis Grizzlies no posto 60 do draft NBA e na tempada 2021-2022 xogou a G-League enrolado nas filas do Osceola Magic.

Asina unha media de 7,4 puntos e 2,2 rebotes en 96 partidos que xogou en Euroliga, con Baskonia, Olympiacos, Khimki e Unics, aos que engade outros 38 encontros en Eurocup con VEF Riga e Zenit.

O director deportivo, Eduardo Pascual, explicou os motivos da fichaxe: “Con Jānis Timma, engadimos ao Monbus Obradoiro un xogador para reforzar as posicións interiores. Ten moita calidade no pase e no lanzamento de tres puntos. O esforzo do club por dotar ao equipo de todos os recursos, de aquí a final de tempada, foi grande”.

O Monbus Obradoiro incorpora a Jānis Timma

Últimas novas

#SomosOBRA